ស្ត្រីដែលដេញបាញ់ព្រះសង្ឃក្នុងវត្តសារ៉ាវ័ន្ដ ត្រូវ តុលាការចោទប្រកាន់ ពីបទប៉ុនប៉ងឃាតកម្ម

ភ្នំពេញន៖ ក្រោយបើកការ ស៊ើបសួរបានបញ្ចប់ លោកស្រី កែវ សុគន្ធា ព្រះរាជអាជ្ញា រងអមសាលាដំបូងរាជធានីភ្នំពេញ បានសម្រេចជា ផ្លូវការហើយ ដោយចោទប្រកាន់ លើស្ត្រីឈ្មោះ ផាន ស្រីលីន អាយុ២៩ឆ្នាំ ពីបទប៉ុនប៉ង ឃាតកម្ម និងប្រើប្រាស់អាវុធ ដោយខុសច្បាប់។ នេះបើយោងតាម មន្ត្រីសាលាដំបូងរាជធានីភ្នំពេញ បានឲ្យបានដឹងនៅរសៀលថ្ងៃទី១០ ខែមិថុនា ឆ្នាំ២០១៩។

សូមរំលឹកថា នៅវេលា ម៉ោង៦និង ១៥នាទីយប់ ថ្ងៃទី០៧ ខែមិថុនា ឆ្នាំ២០១៩ ស្ថិតនៅក្នុងវត្តសារ៉ាវ័ន្ត ក្នុងកុដលេខ២៣ សង្កាត់ជ័យជំនះ ខណ្ឌដូនពេញ រាជធានីភ្នំពេញ។ សមត្ថកិច្ចនគរបាលខណ្ឌដូនពេញ បានឃាត់ខ្លួនស្ត្រីឈ្មោះ ផាន ស្រីលីន អាយុ២៩ឆ្នាំ រួមទាំងវត្ថុតាងអាវុធខ្លី ១ដើមក្រោយ បាញ់គំរាមព្រះសង្ឃចំនួន២គ្រាប់ ។

លុះនៅព្រឹក ថ្ងៃទី០៩ មិថុនា ២០១៩ នគរបាល ព្រហ្មទ័ណ្ឌខណ្ឌដូនពេញ បានបញ្ចូនខ្លួន ជនសង្ស័យ ផាន ស្រីលីន រួមនិងសុំណុំរឿង ទៅតុលាការ ដើម្បីប្រគល់ជូនតំណាងអយ្យការអមសាលាដំបូងរាជធានីភ្នំពេញ បើកការស៊ើបសួរ និងចោទប្រកាន់ តាមផ្លូវច្បាប់ ពាក់ពន្ធ័ករណី បាញ់ចំនួន ២គ្រាប់ នៅក្នុងវត្តសារ៉ាវ័ន្ត ស្ថិតក្នុងកុដិលេខ២៣។