ACU បញ្ជូនឧកញ៉ា សុខ ប៊ុន និងបក្ខពួកមកតុលាការ ពាក់ព័ន្ធការប៉ះពាល់ទ្រព្យសម្បត្តិរដ្ឋ

ភ្នំពេញ ៖ ជនសង្ស័យចំនួន៦នាក់ ក្នុងនោះមានឧកញ៉ា សុខ ប៊ុន មួយរូបផង ត្រូវបានអង្គភាពប្រឆាំងអំពើពុករលួយ ចាប់បញ្ជូនមកសាលាដំបូងរាជធានីភ្នំពេញ នៅព្រឹកថ្ងៃទី២៤ ខែមិថុនានេះ ដើម្បីសាកសួរ ពាក់ព័ន្ធករណីប៉ះពាល់ទ្រព្យសម្បត្តិរដ្ឋ ។ 

សូមរំលឹកថា ឧកញ៉ា សុខ ប៊ុន ធ្លាប់មានអាស្រូវផ្អើលប្រទេសនៅអំឡុងពាក់កណ្ដាលឆ្នាំ២០១៥ ដោយលោកបានវាយទាត់ធាក់កញ្ញាសាសា នៅក្នុងភោជនីយដ្ឋានមួយ នារាជធានីភ្នំពេញ រួចគេចខ្លួនទៅក្រៅប្រទេស ។ បន្ទាប់មកក៏ត្រូវបានចាប់ខ្លួនវិញ ដោយមានបទបញ្ជាពីនាយករដ្ឋមន្ដ្រី ឱ្យឃាត់ខ្លួនឧកញ៉ា សុខ ប៊ុន ឱ្យបាន ដើម្បីទទួលទោសតាមច្បាប់ ។ 

ក្រោយពីការចាប់ខ្លួន ដំណើរការនីតិវិធីច្បាប់បានប្រព្រឹត្តទៅ ក្រោមបទចោទប្រកាន់ « ប្រើអំពើហិង្សាដោយចេតនាមានស្ថានទម្ងន់‍ » ដែលបានប្រព្រឹត្តលើកញ្ញា ឯក សុជាតា ហៅសាសា កាលពីថ្ងៃទី២ ខែកក្កដា ឆ្នាំ២០១៥ រួចបញ្ជូនទៅកាន់ពន្ធនាគារព្រៃស ។ 

បាត់មុខមួយរយៈកាល ឧកញ៉ា សុខ ប៊ុន បានល្បីឈ្មោះម្ដងទៀត ដោយជម្លោះជាមួយប្រជាពលរដ្ឋ នៅតាមបណ្ដាខេត្តមួយចំនួន ដូចជាខេត្តព្រះសីហនុ និងខេត្ដកំពង់ឆ្នាំងជាដើម ៕