តំណាងអយ្យការសម្រេចចោទប្រកាន់ លោកឧកញ៉ា សុខ ប៊ុន និងអាជ្ញាធរកោះរ៉ុង៥នាក់


ភ្នំពេញ ៖ ព្រះរាជអាជ្ញារងអមសាលាដំបូងរាជធានីភ្នំពេញ នៅរសៀលថ្ងៃទី២៤ ខែមិថុនា ឆ្នាំ២០១៩នេះ បានសម្រេចចោទប្រកាន់លោកឧកញ៉ា សុខ ប៊ុន និងអាជ្ញាធរកោះរ៉ុងចំនួន៥នាក់ ពាក់ព័ន្ធការរំលោភដីខុសច្បាប់ « បំផ្លាញដោយចេតនានិងគៃបំបាត់ដោយទុច្ចរិត, វីតិក្រម, ក្លែងបន្លំឯកសារសាធារណៈ និងប្រើប្រាស់ឯកសារសាធារណក្លែង ប្រព្រឹត្តនៅសង្កាត់កោះរ៉ុង ក្រុងកោះរុង ខេត្តព្រះសីហនុ កាលពីអំឡុងឆ្នាំ២០១៦ ដល់ឆ្នាំ២០១៩ » ។ 

ជនសង្ស័យទាំង៦នាក់ ទី១ឈ្មោះ អ៊ុង និត ប្រធានក្រុមប្រឹក្សាសង្កាត់កោះរ៉ុង ក្រុងកោះរ៉ុង ខេត្តព្រះសីហនុ ទី២ឈ្មោះ សេង ហួលាង ចៅសង្កាត់កោះរ៉ុង ទី៣ឈ្មោះ ហែម សាឡេះ សមាជិកក្រុមប្រឹក្សាសង្កាត់កោះរ៉ុង ទី៤ឈ្មោះ កែ សោម ចៅសង្កាត់រងទី២ ទី៥ឈ្មោះកែវពៅ មេភូមិព្រែកស្វាយ និងទី៦ឈ្មោះ សុខ ប៊ុន អគ្គនាយកសុខប៊ុនគ្រុប ។ 

សូមជម្រាបថា ជនសង្ស័យចំនួន៦នាក់ ក្នុងនោះមានឧកញ៉ា សុខ ប៊ុនមួយរូបផង ត្រូវបានអង្គភាពប្រឆាំងអំពើពុករលួយ បញ្ជូនមកសាលាដំបូងរាជធានីភ្នំពេញ នៅព្រឹកថ្ងៃទី២៤ ខែមិថុនានេះ ដើម្បីសាកសួរពាក់ព័ន្ធ ករណីប៉ះពាល់ទ្រព្យសម្បត្តិរដ្ឋធ្ងន់ធ្ងរ ៕