កម្មករ២នាក់កប់ក្រោមអគារបាក់បែក៣ថ្ងៃ តែនៅមានជីវិត

ព្រះសីហនុ ៖ គិតត្រឹមវេលាម៉ោង៤និង៣០រសៀល ថ្ងៃទី២៤នេះ ក្រុមប្រតិបត្តិការជួយសង្គ្រោះ បានរុករកឃើញជនរងគ្រោះបន្ថែមចំនួន៤នាក់ទៀត ក្នុងនោះមាន២នាក់នៅមានជីវិត ។ ដូចនេះអ្នកស្លាប់សរុបមានចំនួន២៨នាក់ ( ប្រុស២៤, ស្រី៤) អ្នករបួសសរុប២៦នាក់ ( ប្រុស២៤នាក់, ស្រី២នាក់) រីឯគំនរបាក់បែក ត្រូវបានក្រុមការងារជួយសង្គ្រោះ ធ្វើការកាយចេញ បានចំនួន៨៥ភាគរយហើយ ។ 

ជាមួយគ្នានេះ វត្តមានដ៏ខ្ពង់ខ្ពស់ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កំពុងអញ្ជើញពិនិត្យសកម្មភាពរុករក និងសង្រ្គោះ និងអញ្ជើញសាកសួរសុខទុក្ខអ្នករងរបួស កំពុងសម្រាកព្យាបាល នៅតាមមន្ទីរពេទ្យនានា ក្នុងខេត្តព្រះសីហនុ ។ 

សូមជម្រាបថា ករណីបាក់រលំអគារកម្ពស់៧ជាន់ បណ្ដាលឱ្យមានមនុស្សស្លាប់និងរបួសជាច្រើននាក់ កាលពីវេលាម៉ោង៤និង១០នាទីទៀបភ្លឺ ថ្ងៃទី២២ ខែមិថុនា ឆ្នាំ២០១៩ ស្ថិតនៅភូមិទី៣ សង្កាត់លេខ៤ ក្រុងព្រះសីហនុ ខេត្តព្រះសីហនុ ៕