ចាប់បានជនសង្ស័យ២នាក់ ក្រោយធ្វើសកម្មភាពឆក់ទូរស័ព្ទពីជនបរទេស

ភ្នំពេញ ៖ ជនសង្ស័យពីរនាក់ ត្រូវបានចាប់ខ្លួន បន្ទាប់ពីធ្វើសកម្មភាពឆក់ទូរស័ព្ទ ពីជនបរទេសម្នាក់ កាលពីវេលា ម៉ោង១០និង៣០នាទីយប់ ថ្ងៃចន្ទ ទី៨ ខែកក្កដា ឆ្នាំ២០១៩ ស្ថិតនៅតាមបណ្តោយផ្លូវ៣៦៩ ត្រង់ចំណុចស្ថានីយ៍បូមទឹកព្រះពន្លា ក្នុងសង្កាត់ព្រែកប្រា ខណ្ឌច្បារអំពៅ រាជធានីភ្នំពេញ ។

ជនសង្ស័យទី១មានឈ្មោះ វាទ វាសនា ភេទប្រុស អាយុ២០ឆ្នាំ ស្នាក់នៅសង្កាត់ព្រែកប្រា ខណ្ឌច្បារអំពៅ ( ជាអ្នកឌុប) និងទី២ មានឈ្មោះ ខុម រាជ ភេទប្រុស អាយុ១៩ឆ្នាំ ស្នាក់នៅផ្ទះជួល សង្កាត់ព្រែកប្រា ខណ្ឌច្បារអំពៅ ( អង្គុយពីក្រោយជាអ្នកឆក់) ជិះម៉ូតូមួយគ្រឿង ម៉ាកហុងដាសង់ប៊ិច ស៊េរី២០១២ ពណ៌ខ្មៅ ពាក់ស្លាកលេខ កណ្តាល1S-3256 ចំណែកជនរងគ្រោះ មានឈ្មោះ Lyu  GVONG (លីគ័ងនីង)ភេទប្រុស អាយុ៥០ឆ្នាំ ជនជាតិចិន មុខរបរបុគ្គលិករោងចក្រយីវ៉ូ ស្នាក់នៅសង្កាត់ព្រែកប្រា ខណ្ឌច្បារអំពៅរាជធានីភ្នំពេញ (ថ្មើរជើង) ។

តាមប្រភពពីនគរបាលប៉ុស្តិ៍ព្រែកប្រាបានឲ្យដឹងថា មុនកើតហេតុសមត្ថកិច្ច បានជិះម៉ូតូល្បាតតាមភូមិសាស្រ្តមូលដ្ឋាន គោលបំណងបង្កានិងបង្រ្កាបរាល់បទល្មើសផ្សេងៗ  លុះមកដល់ចំណុចកើតហេតុក៏ឃើញជនរងគ្រោះ កំពុងឈរនិយាយទូរស័ព្ទ ត្រូវជនសង្ស័យពីរនាក់ ជិះម៉ូតូមកធ្វើសកម្មភាព ឆក់ទូរសព្ទ័ម៉ាក HUAWEI (ហ៊ួរវ៉ៃ) បានសម្រេចរួចគេចខ្លួន ។ ភ្លាមៗសមត្ថកិច្ចបានជិះម៉ូតូដេញពីក្រោយ រហូតដល់បុរីជ្រោយបាសាក់ ក៏ត្រូវចាប់បានតែម្ដង ។

បច្ចុប្បន្នជនសង្ស័យទាំងពីរនាក់ ត្រូវបានឃុំខ្លួនបណ្ដោះអាសន្ននៅប៉ុស្តិ៍ និងទទួលពាក្យបណ្តឹងរួចប្រគល់ទូរស័ព្ទជូនជនរងគ្រោះវិញ ៕ ដោយ ៖ ធ្នូជ័យ