លោក លឹម ភ័ណ្ឌ ប្ដឹងសមត្ថកិច្ចមួយក្រុមដែលចុះបង្ក្រាបសិប្បកម្មខ្លួន ដោយស្នើសុំ៨ចំណុច ក្នុងនោះទាមទារប្រាក់១លានដុល្លារ រួចផ្ដន្ទាទោស

ភ្នំពេញ ៖ យោងតាមបណ្ដឹងរបស់លោក លឹម ភ័ណ្ឌ ដែលជាម្ចាស់សហគ្រាស «លឹមភ័ណ្ឌផលិតទឹកសុទ្ធទឹកក្រូច» នៅទីរួមខេត្តកំពង់ធំ បានដាក់ពាក្យបណ្ដឹងទៅកាន់ ឯកឧត្ដមនាយឧត្តមេនីយ៍ មៀច សុផាន់ណា ប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ ( គ.ប.ផ.ក) ដោយស្នើសុំប្ដឹងលោក កាន់ វឌ្ឍនា និងសមត្ថកិច្ចទាំងអស់ ដែលបានចូលរួមក្នុងប្រតិបត្តិការនោះ ដោយទាមទារសំណង១លានដុល្លារ រួចផ្ដន្ទាទោសតាមច្បាប់ និងសំណើ៨ចំណុចផ្សេងទៀត។ សេចក្ដីលម្អិតនៃពាក្យបណ្ដឹង មានភ្ជាប់នៅខាងក្រោម ។ 

សូមរំលឹកថា សិប្បកម្មខាងលើនេះ ត្រូវបានសមត្ថកិច្ចចុះបង្ក្រាបនៅវេលាម៉ោង១១និង៣០នាទីព្រឹក ថ្ងៃទី១០ ខែកក្តដា ឆ្នាំ២០១៩ ស្ថិតនៅសង្កាត់ព្រៃពន្លិច ក្រុងស្ទឹងសែន ខេត្តកំពង់ធំ ដែលមានម្ចាស់សិប្បកម្មឈ្មោះ លឹម ភ័ណ្ឌ ត្រូវជាអនុប្រធានសភាពាណិជ្ជកម្មកំពង់ធំ និងព្រះវិហារ ។ ប្រតិបត្តិការនេះ មានការចូលរួមពី លោក អ៉ិត សុធា ព្រះរាជអាជ្ញាអមសាលាដំបូងខេត្តកំពង់ធំ អមដោយលោកព្រះរាជអាជ្ញារង ដួង សារ៉ន  លោកឧត្តមសេនីយ៍ត្រី កាន វឌ្ឍនា អនុប្រធានលេខាធិការដ្ឋាន រួមទាំងសមត្ថកិច្ចអធិការក្រុងស្ទឹងសែន ។

សមត្ថកិច្ចឱ្យដឹងថា ទឹកក្រូចដែលមានស្លាកសញ្ញា LP កំពុងតែចរាចរណ៍ និងចែកចាយយ៉ាងទូលំទូលាយ ក្នុងខេត្តកំពង់ធំ សៀមរាប និងព្រះវិហារ និងខេត្តមួយចំនួនទៀត ត្រូវបានរកឃើញចំនុច មិនប្រកតីចំនួន៦មុខ ទី១មិនបានសុំច្បាប់ចុះបញ្ជីផលិតផល នៅលើសំបកវេចខ្ចប់ មិនមានច.ប.ផ ទី២នៅលើសំបកវេចខ្ចប់ ដាក់អាសយដ្ឋានមិនពិតប្រាកដ ទី៣មិនមានវិញ្ញាបនបត្របញ្ជាក់គុណភាព ទី៤ប្រើប្រាស់សារធាតុគីមី ( សម្រាប់ផលិតទឹកក្រូច) ទី៥ទំនិញនាំចូលគ្មានប្រភពច្បាស់លាស់ ទី៦រក្សាទុកទំនិញខូចគុណភាពនិងហួសកាលបរិច្ឆេទ ទី៧នៅលើសំបកវេចខ្ចប់ទឹកសុទ្ធមិនមានចុះបញ្ជី( CS) ៕