យុទ្ធនាការសម្អាតសំរាមទូទាំងក្រុងព្រះសីហនុ ដើម្បីសោភ័ណភាព អនាម័យ សុខភាព និងស្ទង់ពីសមត្ថភាពក្រុមហ៊ុនប្រមូលសំរាម

ព្រះសីហនុ ៖ យុទ្ឋនាការសំអាតអនាម័យ បរិស្ថានទីក្រុង “ ដើម្បីប្រមូល បោសសម្អាត កាកសំណល់ (សំរាម) ដែលមាននៅតាមដងផ្លូវ និងតាមទីសាធារណៈនានា ក្នុងក្រុងព្រះសីហនុទាំងមូល ត្រូវបានធ្វើឡើង នាព្រឹកថ្ងៃ​ទី១៣ ខែកក្កដា ឆ្នាំ២០១៩ ដើម្បីសោភ័ណភាព អនាម័យ សុខភាព និងស្ទង់ពីសមត្ថភាពក្រុមហ៊ុនប្រមូលសំរាមផងដែរ ។ 

ឯកឧត្តម គួច ចំរើន អភិបាលខេត្តព្រះសីហនុ បានប្រាប់​ឱ្យដឹងថា ការប្រមូលផ្តុំកម្លាំងនិងមធ្យោបាយ​ តាមការស្មគ្រ័​ចិត្ត​ចូលរួមពីប្រជាពលរដ្ឋ មន្ត្រីរាជការ និងផ្នែកឯកជននៅថ្ងៃនេះ គឺដើម្បីធ្វើ​ការ​សម្អាតសំរាម ដែលនៅសល់យូរ​ច្រើនថ្ងៃខែ​​មកហើយ នៅតាមផ្លូវនិងទីសាធា​រណៈ​នានា ក្នុងទីក្រុង ឱ្យបានស្អាតម្តង រួចហើយប្រគល់​ឱ្យ​ទៅ​ក្រុមហ៊ុន ដែលមាន​ភារកិច្ចធ្វើការគ្រប់គ្រង និងសម្អាតបន្ត កុំ​ឱ្យមាននៅសល់សំរាមតទៅ​ទៀត ។

សំរាមដែលគេឃើញ មានគរពាសវាលពាសកាលតាមដងផ្លូវ ទីសាធារណៈ ​ដីឡូត៍ មិនមានម្ចាស់នៅ គឺជាសំរាមដែលក្រុមហ៊ុនប្រមូលសំរាមដឹកចេញ​មិន​អស់​ និងសំរាមរបស់ប្រជាពលរដ្ឋមានលំនៅដ្ឋាន នៅតាមផ្លូវតូចៗ ដែលក្រុមហ៊ុនមិនបាន​ចូលទៅយក ក៏ត្រូវប្រជាពលរដ្ឋយកមកចោលតាមព្រៃ ដីឡូត៍ ឬទីទួល លុះនៅ​ពេលមា​ន​ភ្លៀងខ្លាំងធ្លាក់មក សំរាមទាំងនោះក៏បានហូរធ្លាក់តាមទឹក មកទីទាប ឬចូលផ្លូវទឹក បង្កឱ្យស្ទះទឹកលិចផ្លូវថ្នល់ និងភូមិដ្ឋាន ។

សំរាមនៅក្រុងព្រះសីហនុ ទទួលខុសត្រូវដឹកជញ្ជូនចេញ  ដោយក្រុមហ៊ុន ​ក្នុងស្រុកមួយឈ្មោះជា អក្សរកាត់KSWM តាមរយៈរថយន្តនិងគ្រឿងចក្រចំនួន​៦៨គ្រឿង។ ចំនួនរថយន្តសម្រាប់ដឹកសំរាម បើធៀបជាមួយនឹងបរិមាណសំរាម​​ប្រចាំថ្ងៃ  គឺមិនមានសំរាមនៅសេសសល់តាមទីសាធារណៈ​នោះ​ឡើយ  ប្រសិនបើ​ក្រុមហ៊ុនធ្វើការគ្រប់គ្រងបានត្រឹម​ត្រូវនោះ ។ ជាមួយគ្នានេះ ឯកឧត្ដមក៏បានអំពាវដល់ប្រជាពលរដ្ឋ ក្រុមអាជីវករទាំងអស់ មេត្តា ជួយវិចខ្ចប់ និងទុកដាក់សំរាមអោយបានត្រឹមត្រូវ ដើម្បីបរិស្ថាន អនាម័យ មិនបង្កជាមេរោគប៉ះពាល់សុខភាព និងដើម្បីអោយក្រុមហ៊ុនប្រមូលសំរាមងាយនឹងប្រមូលផងដែរ ៕