ឃាត់ខ្លួនអ្នកចាត់ការទូទៅក្រុមហ៊ុនទេសចរណ៍ Adventure Cambodia ពីបទឆបោក (ចេញមូលប្បទានប័ត្រគ្មានសាច់ប្រាក់ )

ភ្នំពេញ ៖ កម្លាំងការិយាល័យស៊ើបអង្កេតនិងអនុវត្តនីតិវិធី បានឃាត់ខ្លួនជនបរទេសម្នាក់ នាវេលាម៉ោង៩យប់ ថ្ងៃទី១៣ ខែកក្កដាឆ្នាំ២០១៩ ពីបទឆបោក (ចេញមូលប្បទានប័ត្រគ្មានសាច់ប្រាក់) ។ជនបរទេសរូបនេះ មានឈ្មោះ OKKAR KYWE ភេទប្រុស អាយុ២៩ឆ្នាំ ជនជាតិភូមា មុខរបរអ្នកចាត់ការទូទៅក្រុមហ៊ុនទេសចរណ៍ Adventure Cambodia ស្នាក់នៅភូមិគ្រួស សង្កាត់ស្វាយដង្គំ ក្រុងសៀមរាប ខេត្តសៀមរាប ។ 

សូមជម្រាបថា កាលពីថ្ងៃទី២៨ ខែឧសភា ឆ្នាំ២០១៩ ជនសង្ស័យបានចេញមូលប្បទានប័ត្រធនាគារមួយ ចំនួន០១សន្លឹក មានទឹកប្រាក់១,៥០០$ ឲ្យទៅសណ្ឋាគាររ៉ូយ៉ាល់អង្គររីសត ដើម្បីទូទាត់ប្រាក់ ដែលខ្លួននៅជំពាក់សណ្ឋាគារថ្លៃបន្ទប់ ប៉ុន្តែពេលដែលសណ្ឋាគារយកមូលប្បទានប័ត្រនោះ ទៅធនាគារដើម្បីបើកប្រាក់ ខាងធនាគារបានបញ្ជាក់ថា មូលប្បទានប័ត្រនេះពុំមានសាច់ប្រាក់ទេបន្ទាប់មកទៀត ជនសង្ស័យបានព្យាយាមពន្យាពេល មិនព្រមដោះស្រាយ ជាមួយខាងសណ្ឋាគាររហូត ។

បច្ចុប្បន្នជនសង្ស័យ ត្រូវបានលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប សម្រេចឲ្យឃាត់ខ្លួនបណ្តោះអាសន្ន នៅស្នងការដ្ឋាននគរបាលខេត្ត ដើម្បីរៀបចំកសាងសំណុំរឿង បញ្ជូនទៅសាលាដំបូងខេត្ត ចាត់ការបន្តតាមនីតិវិធី៕