ឯកឧត្ដម វេង សាខុន សន្យាថានឹងផ្តល់ពូជជាកូនជ្រូកថ្មី ដល់គ្រួសារកសិករដែលទទួលផលប៉ះពាល់កន្លងមក ដោយជំងឺប៉េស្តជ្រូកអាហ្រ្វិក

ត្បូងឃ្មុំ ៖ រដ្ឋមន្រ្តីក្រសួងកសិកម្មរុក្ខាប្រមាញ់និងនេសាទ ឯកឧត្តម វេង សាខុន បានសន្យាថានឹងផ្តល់ពូជជាកូនជ្រូកថ្មីដល់គ្រួសារកសិករ ដែលទទួលផលប៉ះពាល់ដោយជំងឺប៉េស្តជ្រូកអាហ្រ្វិក បណ្ដាលឱ្យជ្រូកស្លាប់កន្លងមក ដើម្បីមានលទ្ធភាព ធ្វើការស្តារឡើងវិញ លើការចិញ្ចឹមឡើងវិញ របស់ពួកគាត់ ។

ឯកឧត្ដមមានប្រសសន៍បែបនេះ ក្នុងឱកាសឯកឧត្តមរួមជាមួយសហការី បន្ទាប់ពីចប់កម្មវិធីក្នុងវត្តឧទ្យានកែវល្ពាករួចមក បានធ្វើដំណើរមកកាន់ ភូមិសោយឃុំមៀន ស្រុកអូររាំងឪ ខេត្តត្បូងឃ្មុំ ដើម្បីចុះមកពិនិត្យសកម្មភាពយកសំណាកឈាមជ្រូក មកធ្វើតេស្តវិភាគរកមេរោគជំងឺប៉េស្តជ្រូកអាហ្រ្វិក របស់មន្រ្តីបសុព្យាបាល នាព្រឹកថ្ងៃទី១៤ ខែកក្កដា ឆ្នាំ២០១៩ ។ 

ឯកឧត្ដមមានប្រសសន៍បន្តថា ការងារបច្ចេកទេសសំខាន់ៗ ត្រូវបានអនុវត្តជាបណ្តើរៗ ដូចជាការធ្វើជីវសុវត្ថិភាព ការផ្សព្វផ្សាយ ការកំណត់តំបន់ផ្ទុះជំងឺ និងការធ្វើចត្តាឡីស័ក ។ល។ អគ្គនាយកដ្ឋានផលិតកម្មសត្វនិងសុខភាពសត្វ សហការជាមួយមន្ទីរកសិកម្មរុក្ខាប្រមាញ់និងនេសាទខេត្ត នឹងនៅបន្តដោះស្រាយបញ្ហា ជូនប្រជាជន ធ្វើយ៉ាងណាឲ្យពួកគាត់អាចលក់ជ្រូក ដែលមានសុខភាពល្អមិនឆ្លងជំងឺ បន្ទាប់ពីបានធ្វើតេស្តឈាមរួច ។

ក្នុងឱកាសនេះ ឯកឧត្តមរដ្ឋមន្រ្តីបានចូលរួមចែករំលែកនូវការខាតបង់ផ្នែកសេដ្ឋកិច្ច របស់បងប្អូនដែលជាម្ចាស់សត្វ និងបានស្នើឲ្យមន្ទីរសហការ ជាមួយមន្រ្តីបសុព្យាបាល ចេញវិញ្ញាបនបត្របញ្ជាក់សុខភាពសត្វ ឲ្យម្ចាស់សត្វ ឲ្យបានទាន់ពេលវេលា ហើយបានសន្យាថា នឹងផ្តល់ពូជជាកូនជ្រូកថ្មីដល់គ្រួសារកសិករ ដែលទទួលផលប៉ះពាល់កន្លងមក ដើម្បីមានលទ្ធភាពធ្វើការស្តារឡើងវិញលើការចិញ្ចឹមឡើងវិញរបស់ពួកគាត់ នៅពេលអគ្គនាយកដ្ឋាន បានពិនិត្យឃើញថា ទីតាំងដែលបានប៉ះពាល់នោះ បានត្រឡប់មកភាពប្រក្រតីវិញហើយនោះ ៕