ឃាត់វៀតណាម១២នាក់ ឆ្លងដែនដោយខុសច្បាប់មករកស៊ីលក់ឆ្នោត​ នៅក្នុងទឹកដីក្រុងបាវិត


ស្វាយរៀង ៖ ជនជាតិវៀតណាម១២នាក់ ឆ្លងដែនដោយខុសច្បាប់មករកស៊ីលក់ឆ្នោត​ នៅក្នុងទឹកដីក្រុងបាវិត​ ត្រូវបានសមត្ថកិច្ចឃាត់ត្រួតពិនិត្យ ដើម្បីបញ្ឈប់សកម្មភាព និងធ្វើកិច្ចសន្យាបណ្តេញចេញទៅប្រទេសដើមវិញ ។ 

នគរបាលក្រុងបាវិតបានឱ្យដឹងថា ព្រឹកថ្ងៃទី១៤​ ខែកក្កដា​ ឆ្នាំ២០១៩​ កម្លាំងអធិការដ្ឋាន​នគរបាលក្រុងបាវិត​ សហការជាមួយកម្លាំងប៉ុស្ដិ៍នគរបាលរដ្ឋបាលសង្កាត់បាវិត​ និងកម្លាំងវរសេនាតូចនគរបាលការពារព្រំដែនលេខ​៦០៩ ​ចុះជួយក្រុងបាវិត​ ដឹកនាំដោយលោកអនុសេនីយ៍ឯក គោយ យៀង អធិការរងទទួលការងារអន្តោប្រវសន៍​ បានចុះធ្វេីរដ្ឋបាល​ និងត្រួតពិនិត្យជនបរទេស ។ 

សមត្ថកិច្ចបានរកឃើញជនជាតិវៀតណាម១២នាក់ (ស្រី៤នាក់)  ដែលចូលមករកស៊ីក្នុងទឹកដីក្រុងបាវិត​ ដែលឆ្លងដែនដោយខុសច្បាប់មករកស៊ីលក់ឆ្នោត​ និងដកហូតសន្លឹកឆ្នោត៥០៦សន្លឹក។ សមត្ថកិច្ចបានធ្វេីកិច្ចសន្យាអប់រំជនជាតិវៀតណាមទាំង​១២​នាក់​នោះ រួចបណ្តេញចេញទៅប្រទេសដើមវិញហើយ ៕