ឆេះរថយន្តធុនយក្សនិងទំនិញ នៅខណ្ឌច្បារអំពៅ ខូចខាតគិតជាទឹកប្រាក់រាប់ម៉ឺនដុល្លារ

​ភ្នំពេញ​ ៖​ មានរថយន្តធុនយក្សដឹកទំនិញមួយគ្រឿង​ ត្រូវបានអគ្គិភ័យឆាបឆេះយ៉ាងសន្ធោសន្ធៅ​ បង្កការភ្ញាក់ផ្អេីលដល់ប្រជាពលរដ្ឋនិងសមត្ថកិច្ចចុះអន្តរាគមន៍​ កាលពីវេលាម៉ោង៥​ ទាបភ្លឺ​ ថ្ងៃចន្ទ ទី២២​ ខែកក្កដា​ ឆ្នាំ២០១៩​ នៅជិតបុរីហាយធិច២​ ស្ថិតក្នុងភូមិតាង៉ូវក្នុងសង្កាត់និរោធ​ ខណ្ឌច្បារអំពៅ​ រាជធានីភ្នំពេញ​ ។ 

បើកតាមសម្តីតៃកុងឡានបានប្រាប់ថា គាត់មិនដឹងថាបណ្ដាលមកពីមូលហេតុអ្វីបានឆេះនោះទេ ដោយគ្រាន់តែដឹងថា ដំបូងរូបគាត់ដេកក្នុងកាប៊ីនរថយន្ត ក៏ស្រាប់តែមានផ្សែងឆ្ងៀម ហើយរកមើលទើបឃើញភ្លើងឆេះទំនិញពីខាងលើរថយន្តតែម្ដង។ ប្រជាពលរដ្ឋក្បែរនោះ បានឲ្យរាយការណ៍ទៅសមត្ថកិច្ចមូលដ្ឋានឲ្យចុះមកជួយអន្តរាគមន៍ និងចេញរថយន្តពន្លត់អគ្គិភ័យបាញ់ទឹកពន្លត់ ។ 

រថយន្តធុនយក្សខាងលើនេះ គឺម៉ាកហ៊ីយិនដាយ ពណ៌បៃតង ពាក់ស្លាកលេខភ្នំពេញ3D-6074 បានចតស្ងៀម និងមានផ្ទុកទំនិញចម្រុះយ៉ាងច្រើនផងដែរ ។ ករណីឆេះនេះតាំងពីម៉ោង៥ រហូតដល់ ៧និង៥០នាទី ទើបរលត់ទៅវិញ ដោយប្រើប្រាស់រថយន្តពន្លត់អគ្គីភ័យចំនួន២៧គ្រឿង ។ អីវ៉ាន់ក្នុងរថយន្តឆេះស្ទើរតែទាំងស្រុង បើគិតជាលុយអស់រាប់មុឺនដុល្លារ ៕  ដោយ ៖ ធ្នូជ័យ